حبايب قلبي وحشتوني والله جدا جدااااااا بقالي كتير ما عملتش مواضيع في قسم البشرة
المهم يا قمرات عاملين اي يا رب تكونو كلكم بخير ويرزق كل فتوكة منكم بالي تتمناه ويا رب كل بنت تكون السنة دي في بيت جوزها ..آمين
شوفتو بقا انا بحبكم ازاي وما اقدرش اتاخر عليكم
ما تنسوش التقييم بالله عليكم مش هطول عليكم كتير يا قمرات بس الاول عايزة منكم دعوة حلوة انو ربنا يتمملي بخير عشان فرحي الشهر الجاي عقبال كل البنات ان شاء الله
وطبعا بما انو فرحي قرب فانا قولت يا بت يا نانا اي الكسل الي انتي فيه ده
ده الراجل لو روحتي عندو وشافك كده مش بعيد
ههههههههههه ده اثر الصدمة ههههههههههههههه لا مش قوي كده ما تتخضوش اومال انا جاية النهاردة ليه انا قولت لازم افيد العرايس او الفتوكات عامة بخلاصة تجاربي الفترة دي خصوصا اني قريت كذا موضوع عن العرايس المحتاسين وقررت اني افيدهم بالحلول السريعة بس اقرأو الموضوع للنهاية لأني عندي ليكم مفاجآت جامدة في نقط معينة ان شاء الله هحاول اخصص لها مواضيع لوحدها زي المنطقة الحساسة نبدأ بسم الله
أولا : من غير اي نقاش لابد من الآتي من ناحية الاكل
مهم جدا تهتمي بشرب كميات كبيرة من الماء مش اقل من 2 لتر يوميا وما ينفعش تهملي ابدا السلطة الخضراء والفاكهة
ده غير انو حضرتك لازم تنسي بقا الشيبسي والمقليات والشوكولاتة والاكل الحراق والحاجة الساقعة خصوصا لو بتعاني من الحبوب
وصدقيني نظام اكلك بيفرق كتير جدا على بشرتك خصوصا مع الاستمرار ثانيا : الاستحمام والنظافة روتينك من دلوقتي (اعتبري انك بقيتي مدام خلاص )
يعني يا قمرات كلها كام يوم او كام شهر وتكوني في بيتك وما ينفعش ابدا تهملي في نظافتك خصوصا لو بذلتي مجهود وعرقتي
في المطبخ مثلا او شغل البيت
قصدي انك لازم تتعودي انو ده يبقى جزء من يومك عشان تبقي مزة قدام جوزك وما ينفرش منك لا قدر الله
وما تستنيش انو هو يلفت نظرك لحاجة زي كده
ثالثا : الشعر الزايد وخصوصا شعر المنطقة الحساسة
لازم تتعودي كمان على ازالة الشعر باي وسيلة انتي متعودة عليها ولازم تتجرأي شوية بالنسبة للمنطقة اياها ما ينفعش تفضلي خايفة كده
يعني انا بقول اتعودو احسن من الفضايح بعد كده هههههههه
انا يا فتوكات متعودة اني اعمل المنطقة دي من زمان وبجد حابة اطمن كل بنت انها سهلة جدا مع التعود
وصدقيني بعد كده انتي مش هتطيقي تسيبي الشعر فيها
وهدية مني ليكم بقا مش هتصدقو
الكربوناتو العادية الي بنستخدمها في الاكل
بعد اما بتاخدي الشاور بتاعك وتنشفي جسمك دلكي بيها المنطقة الحساسة من غير اي اضافات وبعدين اشطفي المنطقة كويس ونشفيها
عايزة اقولك بجد هتدعيلي لأنها اكثر من رائعة (نظافة وتفتيح ) ومالهاش اي اضرار زي الكريمات
وادهني المكان ده بعد كده بزيت لوز مر او اصبري وكملي الموضوع هقولك على مرطب تحفة
رابعا: لازم تخلي عندك الخلطة الي هقولك عليها وبجد هدية مني ليكي بس هدية هتعجبك جدا وهتدعيلي كمان مرة
نشا+ماء ورد + بودرة تلك
تعجنيهم في علبة كالتالي وتشيليه في التلاجة
استخدميه على بشرة وشك وانتي جاية من الشمس بجد هتلاقيه يجنن وسيبيه لغاية اما ينشف واشطفيه
او للمنطقة الحساسة وانسي بقا يا مزة انتي كده اتدلعتي على الآخر
وبمناسبة الشمس والعمايل الي بتعملها في البشرة
عايزة اقولك ريحي دماغك واستخدمي السن بلوك اي نوع كويس
والله انا كنت رافضة استخدمو بس مرات اخويا جابتلي واحد وبجد من ساعة ما استخدمتو ما بقدرش استغنى عنو
حتى حاولي تستخدميه قبل فرحك لو انتي مش بتحبيه عشان ساعة الفرح تبقى بشرتك لونها طبيعي
خامسا : اغلب مشاكلك حلها في حاجة بسيطة وجدااااااا
ألا وهي الترطيب
وانا دايما بقول (السر في الترطيب المستمر)
لازم يكون جنبك دايما مرطب لأي مكان في الجسم
المرطب ده ممكن يكون كريم انتي بتحبيه او الي هقولك عليه
زي ما انتي شايفة في الصورة كده
اي كريمات مرطبة عندك بتخلطيها ومش شرط حاجة محددة
الي متوفر عندك
ويا سلام بقا لو عندك زيت زيتون او زيت لوز مر او كبسولات فيتامين e وممكن جليسرين
وبتحطيهم في علبة وادهني بيهم اي مكان في جسمك ويا سلام بقا لو دهنتي المنطقة الحساسة بعد ما تعملي بالكربوناتو .. وادعيلي بقا لتالت مرة وممكن يا مزز تخلي كريم جليسوليد الاحمراو المرطب الي فات على مراية الحوض عشان تفتكري دايما ترطبي ايدك ورجلك وحقيقي هتفرق معاكي حكاية الترطيب جدا
وما تنسيش كمان على مراية الحوض بتاعك تخلي عندك دايما الي هتشوفيه دلوقتي
دي بخاخة بملاها ماء ورد وبتفضل قدامي على الحوض كل اما اغسل وشي برش منها بجد بتحسي احساس جميل وريحة تحفة
سادسا : جزء من روتينك هو الباديكير او العناية بالقدمين اما بالسنفرة او الحجر وتدهني رجلك وايدك دايما بالمرطب
والطريقة انك تنقعي رجلك في ماية سخنة وحبة شامبو لمدة عشر دقايق بعدين تنشفي رجلك وتسنفريها كويس جدا وتغسليها كويس وتدهني المرطب والبسي شراب لغاية اما رجلك تمتص المرطب
اي رايكم بقا يا فتوكات
جربو وادعولي
الكلام ده هيبقى روتينك حتى بعد فرحك ولازم تجربي وتعودي نفسك من دلوقتي وكلها حاجات رخيصة ومش هتاخد وقت لأنها دايما قدامك جاهزة
اهتمامك بنفسك من دلوقتي هيفرق معاكي كمان خصوصا قدام زوجك المستقبلي( حلوة المستقبلي دي هههههههه)
بالله عليكم ما تنسوش التقييم لاني تعبت في الموضوع
ولو لقيت تشجيع منكم هكمل مواضيعي ان شاء الله
ولا تنسونا من صالح دعائكم
وفي رعاية الله