السلام عليكم ورحمة الله وبركاته
حبيباتي البعض منا يشكي الوقت وعدم التنظيم والوقت المهدر والمواعين المتراكمة
لذا حبيت انصح خواتي و اعطيهم جدول ينظم حياتهم ووقتهم ومجهودهم ولا والنتائج مبهرة
وقتك لنفسك وبيت منظم واطفال مرتبين
لكن بشرط تتبعين البرنامج بحذافيره من غير تغير ....
اولا ياغاليات
(بورك لامتي في بكورها ) وانا عارفة بتقول نبي ننام نشبع نوووم
بتنامون لاتخافون وبتشبعون نوووووم بس بالاول بتتعبون شوي لكن النتائج تكون مبهرة
اولا وقت الفجر....من الساعة خمسة صباحا
بعد صلاة الفجر قراءة الاذكار وتعويذ الاطفال وهم نائمين
ادخلي المطبخ جهزي فطور عيالك خاصة المدارس وابوهم مرة وحدة توفير للوقت والجهد واخرجي اللحم او الدجاج
وخليه برى
صحي اولادك لبسيهم و فطريهم وطلعيهم طبعا مع تنبيه الكبير بترجيع اغراضة وادواته باماكنها وترتيب سررهم وملابسهم بالسلة الغسيل او اذا كانت نظيفة توضع على جنب او تعلق
ابدئي صباحك بالاستغفار اثناء عملك وتقويمك لاطفالك افضل من الصراخ والتهديد وسبحان الله الاطفال اذا تعوذوا وسمعوا ايات القران يصحون بسهولة وبنفس مطمئنة ونسيت ان اخبرك بعد ماتصلين الفجر تفتحي على قناة القران او تشغلي المسجل...
بعد مايذهبوا اطفالك نصيحة مني لاترجعين تنامين اصلا انتي بتكوني مصحصحة حتى لو مانمتي الا ساعتين...
يكون وفتها الساعة 7 صباحا..
دوري على الغرف واجمعي الغسيل وضعيه بالغسالة امسكي بعدها المكنسة ودوري على البيت ماعدا المجالس والمقلط فقط غرف الاطفال والصالة والمطبخ و قومي بعدها بترتيب سريع وشامل للغرف وتهوية
الغرف
طبعا طول ماانتي تصحين باطفالك رايحه اي شي يطيح بيدك رجعيه مكانه واي شي طايح ارميه
خوذي بعدها سطل االسراميك عبيه ماء ومطهر اي نوع وشوي كلوركس بسيط جدا وامسحي بشكل سريع الاراضي وغرف النوم اذا هي سراميك واخر شي مري على الحمامات اسكبي المطهر على الارضيات وادعكي الكرسي بسائل المرحاض وبخي بخاخ الاسطح على المغاسل وبعد الانتهاء عبي السطل موية وكبيه على الارضيات والمغاسل
اخرجي بعدها من الحمام وخليه ينشف لحاله وخوذي لك فوطة وبخاخ المرايات ومسحي قدامك الطاولات والارفف و
الادراج وبعد ذلك اذهبي للغساله واخرجي الغسيل وانشريه
كذا نكون انتهينا من البيت والحين ريحة البيت كل نظافة وديتول ولمعان باقل من ساعتين...
الوقت هنا يشير للساعة التاسعة....
الان الوقت لك لنفسك خوذي لك كاسة كوفي وسوي لك فطور اذا ماافطرتي مع عيالك وارتاحي نص ساعة وبعدها مهمة صغيرة للي عندها طفل رضيع روحي صحيه وغيري له وفطريه واجلسي انتي وياه عند التلفزيون وسوي اللي تبين ياتقرين ياتاخذي كريم وتحطين بجسمك يا خلطة على وجهك اللي تبين المهم ان الوقت ملكك للساعة 11 ظهرا...
الوقت هنا يشير للساعة 11
ادخلي المطبخ اول شي تسوينه حطي كيس بالمجلة واجمعي صحون الفطور وشطفيها و نقعيها بموية على السريع وحطي لك صحن بلاستيك جنب الفرن وخلي فيه ملعقة كبيرة وسكين تستخدميه متى مااحتجتي
لاخر الطبخة مو كل شوي مطلعه ملعقة..
ركبي على غداك وابدئي غسلي صحون الفطور ونظفي المجلى وبنات تعلموا على اختصار استخدام القدور والمواعين مو تطلعون كل اللي بالدولاب مثلا انا كيف طريقتي لما بسوي ايدام ورز وربي كله بقدر وراحد خخخخ
اول شي احمس الدجاج او اللحم واضع الموية والخضار وبعد ماتنضج الخضار اشيلها واحطها بحافظة ضغيرة او صينة
وواشيل اللحم واحط الرز مكانه بنفس الموية وكل وحدة بطريقتها وبكذا وفرت قدر حق الخضار وماعندي غير قدر واحد...
المهم الساعة 12 ونص تكوني خلصتي الغداء او وحدة تكوني جهزتي الصحون والكاسات والملاعق وقت طهي الاكل
بعدها خوذي لك شور على السريع وبخري البيت او عطريه باي طريقة تعجبك بتكون الساعة وحدة وقت رجوع الاطفال ووالدهم فاءذا كان زوجك من النوع الذي يعود ظهرا جهزي السفرة واستقبلي اولادك وتاكدي من تغير ملابسهم ووضع كل شي بمكانه من شرابات وشنط وجزم وغسل ايدهم ووارجلهم والاوجه وتغدواء بصحة وعافية
بعدها على السريع تساعدوا على رفع السفرة طبعا المطبخ بيكون نظيف ومغسوله كل مواعينه حطي موية مغليه على القدر وغسلي الصحون على السريع ماراح تاخذ منك ربع ساعة....
ملاحظة...
اذا زوجك يرجع العصر من دوامه اذا خلص الاكل سكري عليه واذا مسوية رز لاتحطينه اطبخي اللحم وسكري عليه
وقبل مايجي بربع ساعة العصر سخني موية الرز وحطي الرز ماياخذ وقت وسخني الايدام او الصينية الثانية اهم شي الطبخ يخلص الظهر الساعة 12 ونص عشان مايربك باقي وقتك اكلي اطفالك شي خفيف وشيكي على شنطهم وخوذي فكرة عن واجباتهم الاشياء اللي يبغى لها حفظ سلميها اطفالك وواعديهم بمفاجاءة اذا جاء العصر وهم حافظينها ...
الساعة الان تشير الى 2 سواء جاء زوجك من العمل ام لم يرجع...
نومي طفلك الصغير والاطفال الكبار افتحي لهم تلفزيون او اعطيهم الوان يلونوا المهم اشغليهم بشي لمدة ساعتين روحي بعدها خوذي غفوة مع صغيرك الى الساعة 4 عصرا..
الساعة الان تشير الى الساعة 4 العصر
اعدي الشاي لاطفالك وزوجك وبعض المسليات او الغداء اذا زوجك عاد من العمل بعدها اجمعي اطفالك الكبار وافتحي شنطهم ودرسيهم باءذن الله تكفيهم ساعتين حتى اذان المغرب...
الساعة الان تشير الى الساعة السادسة مساء...
دخلي الاطفال للاستحمام وانتي صلي المغرب واقرئي الاذكار وعوذي اطفالك والكبار تابعي قرائتهم لها وادخلي جهزي العشاء واحرصي تجهزية ماياخذ منك وقت طويل نص ساعة بالكثير واذا كنتي بتسوين شي ياخذ وقت جهزية من الغداء بحيث مايبقى الا شي بسيط وقت العشاء بيكون على الساعة سبعة او سبعة ونص يتعشون اولادك ويفرشون اسنانهم ويتجهزون للنوم مع التنبيه عليهم باعادة العابهم واغراضهم وتشجيعهم..
الساعة الان تشير الى الساعة الثامنة مساء...
الاطفال ناموا بعدها خصصي ساعة فقط للعمل ووقتي لك اذاكان هناك غسيل مغسول من الصباح اكوي ورتبيه ودخلي الدولايب طبعا الغسيل مايكون يومي فاليوم اللي عندك غسيل خصصي هالساعة لترتيبه ام اليوم الذي لايوجد فيه غسيل ادخلي للمجالسة واكنسيها ورتبيهاوانفظيها من الغبار ويوم ادخلي غرفتك ورتبيها ترتيب عميق
او يوم للمسح الجدارن ومساكات الابواب والشبابيك الساعة التاسعة تمام تكون انتهيتي من العمل اذهبي بعدها للمطبخ نظفي بواقي العشاء وادخلي الصحون وامسحي الفرن وشطبي على المطبخ ولن يستغرق غير نصف ساعة فقط لان المطبخ بالاصل نظيف ولايوجد فيه الا بواقي العشاء...
الساعة الان تشير الى الساعة التاسعة والنصف..
هنا خلاص انتهى دورك والوقت اصبح ملكك انتي وزوجك تنظفي على السريع والبسي لبس النوم وجهزي الاجواء
واسترخي انتي وزوجك امام التلفاز او النت واعملي مايحلو لك
اذا صارت الساعة العاشرة اذا لديك رضيع قومي بالتغير له وترضيعه وتنويمه مهم جدا ان ينام باكرا بهذي الساعة
وبعدها اجلسي حرررة الى الساعة 11 واذهبي للنوم انتي وزوجك العزيز...ومن المهم جدا ان تتقيدي باوقات النوم والاستيقاظ لان النوم باكرا يوقظك باكرا والايقاظ باكرا ينومك باكرا خخخخخخ
ايام الخميس والجمعه...
حاولي ان لاتتاخري بالنوم وبعد الاستيقاظ المسارعة للانتهاء من الاعمال عمل خفيف اهم شي البيت يكون مرتب
وبعد العصر لكم الحرية بالخروج او الجلوس ويوم الجمعه حاولي الاستيقاظ على تسعة او عشرة وايقاظ الاطفال والتجهيز لصلاة الجمعه وحاولي ماتاخذي غفوة هاليوم حتى تستطيعي النوم باكرا انتي واطفالك
هذا واسال الله ان يتقبل مني هذا العمل خالصا لو جه ويفيد كثير ممن تخربطوا بحياتهم ولم تنظم امورهم واتمنى الدعاء لي لكل من استفادت من موضوعي
اختكم في الله
الأربعاء أكتوبر 30, 2013 8:56 am